Семсерлесу

Әлем Кубогының Чемпиондары! Қазақстанның жасөспірімдер құрамасы әлемдегі ең мықты командалар арасында өз позициясын сақтап келеді. Манамада (Бахрейн) біздің шпагамен семсерлесушілер – Ғабидин Мұстафин, Нұржан Әбжанов, Кирилл Проходов және Алексей Касаткин жасөспірімдер арасындағы Әлем Кубогының жеңімпаздары атанды. Соңғы екі жылда олар осы турнирдің күміс жүлдегерлері атанып, 2025 жылы тарихи алтынға ие болды!

АФК «Қайрат»

«Қайрат» футзал клубы Қазақстан чемпионаты аясында өткен демалыс күндері «Астана» командасымен қос кездесу өткізіп, 2:4 және 4:12 есебімен жеңіске жетті. Осылайша, алматылық команда турнирлік кестедегі көсбасшы орынын сақтап қалды. Естеріңізге сала кетейік, «Қайрат» футзал клубы УЕФА Чемпиондар Лигасының көктемгі төрттік финалында ел намысын қорғайтын болады.

«Астана» ФК

«Астана» футбол клубы 2025 жылғы алғашқы оқу-жаттығу жиындарын бастады. Григорий Бабаян шәкірттері 18 қаңтар күні Біріккен Араб Әмірліктерінде жаңа маусымға дайындықтарын бастап кетті. Алғашқы жиын 2 ақпанға дейін жалғасады. Осы кезеңде бір жолдастық кездесу жоспарланған. Екінші оқу-жаттығу жиындары 7-20 ақпан аралығында өтеді. Бұл уақытта «Астана» 4 жолдастық кездесу өткізуді жоспарлап отыр. Болашақ қарсыластар туралы ақпаратты клубтың баспасөз қызметі қосымша хабарлайды.

Теннис

Занғар Нұрланұлы Australian Open турнирінің екінші айналымына өтті. 16 жастағы қазақстандық теннисші Занғар Нұрланұлы жұптық сында үндістандық Криши Тьягимен бірге жасөспірімдер арасындағы Australian Open турнирінің екінші айналымына жолдама алды. Қазақстан-Үндістан дуэті австралиялық Хьюитт пен хорватиялық Марковина жұбын 6:2, 1:6, 10:4 есебімен жеңді. Айта кетейік, Занғар жекелей сында да «Үлкен дулыға» турнирінің екінші айналымына шықты.

Үстел теннисі

Қазақстандық Алан Құрманғалиев үстел теннисінен Тунистегі WTT Youth Contender Tunis халықаралық турнирінде бақ сынады. Ол 19 жасқа дейінгі спортшылар арасындағы жарыста ел намысын қорғап, турнирді қола жүлдемен түйіндеді. Алан Құрманғалиев турнир барысында Италиядан барған Данило Фасоны 3:0, польшалық Рафаэль Формеланы 3:1, Ян Мругалды 3:0, чехиялық Степан Брельді 3:1 және Бельгия спортшысы Том Клоссетті 3:1 есебімен жеңді. Алайда, жартылай финалда ол румыниялық Юлиан Чиритуден 0:3 есебімен ұтылып, қола жүлдегер атанды.