Жапония астанасы Токиода өткен жазғы XXV Сурдлимпиада ойындарының ресми жабылу салтанаты өтті. Төрт жылда бір рет өткізілетін есту қабілеті нашар спортшыларға арналған ең ірі халықаралық спорттық іс - шара биылғы жылы ерекше тарихи маңызға ие болды. Бұл Сурдлимпиада қозғалысының 100 жылдық мерейтойына сәйкес келді.

Байрақты бәсекеге 81 елден келген 3000-нан астам спортшы қатысып, олар 21 спорт түрінен 209 пән бойынша бақ сынады. Қазақстан ұлттық құрамасы сапында 79 спортшы спорттың 8 түрінен жарыс жолына шығып, нәтижесінде 8 алтын, 4 күміс және 13 қола медаль жеңіп, жалпы медальдік есепте 9-шы орынға тұрақтады.