Жазғы Олимпиада ойындарының тарихында тұңғыш рет ашылу салтанаты стадионда өткен жоқ. Бүкіл әлем көз тіккен шара қаланың қақ ортасынан өтетін Сена өзенінің бойында ұйымдастырылды. 6 шақырымға созылған шеру Аустерлиц көпірінен басталып, онда әр елдің делегациясы қайықпен жүзіп өтті.

Еліміздің туын алып шығу мәртебесі бокстан Қазақстан құрамасының капитаны, 2023 жылғы Әлем чемпионы Асланбек Шымбергенов пен жеңіл атлетикадан 2014 жылғы Азия ойындары мен 2017 жылғы Азия чемпионатының жеңімпазы Ольга Сафронова сеніп тапсырылды.

Айта кетейік, Франция астанасында өтетін төрт жылдықтың басты бәсекесіне Қазақстандық спортшылар спорттың 25 түрінен 91 жолдама иеленді. Ел намысын аталмыш додада 79 спортшы қорғайтын болады.

Фото: Турар Казангапов @olympickz